الشاعر:جمعة عبد الرحيم بوخبينة الزوي

استعرض الموضوع السابق استعرض الموضوع التالي اذهب الى الأسفل

الشاعر:جمعة عبد الرحيم بوخبينة الزوي

مُساهمة من طرف الليبي الصقع في الأحد 06 يونيو 2010, 7:03 am

القصيدة الأولى: واخــذ دلالـــي


شاعر وعندي هوايات ................... وف الجو واخذ دلالي
ونحكي علي كل حالات.................. وفي الوصف واسع خيالي
وحافظ سهاري قديمات .................. من بوي ياما حكالي
امجوّل علي كل جيهات ................. ونازاد كاثر سوالي
نريد نحفظه بالدلالات ................... تاريخ سابق اجيالي
لنا ع الجضر بيه هيلات ................ وينما انرتــّب احوالي
ولا عندنا باب همـّـات .................. امقيمين والمال فالي
وما جبــّـدن ها الخطارات ............. إلا الوطن ريناه خالي
والناس حيلها في البلادات .............. وساكنين بالاص عالي
وما تقول كانوا زمانات ................. سكّان في خلا كيف حالي
وعليهم يحوشن الخلفات ................ بعد ثلث م الليل تالي
او وينما لفن شور لمبات ............... يجوهن اسراب العيالي
املاقيينهن بالعقالات .................... امغير كان زام القلالي
رعد يـدّقـل في سحابات ................ عقب ليل جورة ليالي
وف الصبح يجنها شبابات ............. لابسات عالي البذالي
وعاد يبرمن بالقداحات ................. وطاربات ماهن كسالي
وين حلبـّـن جن رادّات ................. ورويوا جميع النزالي
حليب كسر من ثدي فلاّت .............. يجود وان فرط البهالي
واحذاه طرحات طرحات ............... اتزهّي النواظر توالي
البيت بو زرد بو كمامات ............... بو نضد لركان مالي
اعداد شولها فوق ميـّـات ............... من غير حشوها والمتالي
وانكان عزّبت زاد ما تبات ............. إلا في هشاش الرمالي
واليوم ماعليها سوالات ................. ولا سيابها صاد بالي
وهي قبل يمحا الغلات .................. رفقها يسلّـي تسالي
وبها نسافروا ع الواحات ............... وتجيب تمر عز الوكالي
ويبقن طرابه الوشنات ..................بعد كرب والمير غالي
نهار وردها ع القناوات ............... تروّح ارسالي ارسالي
ومعاها عواويل صبّات ............... ايهنّـوا ان صار القتالي
اجواد يطرشوا في النقابات ........... لهم صيت كيف الهلالي
بالفعل ما هي دعايات ............... و لانزيدهم في اقوالي
ايجوا فوق سبّـق امتلا ّت .......... وحاضنينهن بالمخالي
يخلّوا اقران المغيرات .............. م الظيم يطلبوا في الدخالي
كما نار في وان هفكات ............. ولعت في حطب دار بالي
نلقان قدرها مو الهانات ............ بعد عز تبقى جوالي
سماح الهلل فوق قارات ............. متراشيات هي والغزالي
حلال شكرها بالكلامات ........... وتمجيدها بالكمالي



--------------------------------------------------------------------------------

القصيدة الثانية : غـلاك الـجـايـر
غلاك الجاير......اللي طب ما يندار فيا داير..... اشقا بالدوا داوي

غلاك الماكن ....................اللي بنار في وسط الجواجي ساكن
أنظاري اللي بداهن مضن يشّاكن.... امشاكات من عانى صغا وقهاير
لاهنت لا غيرك عليه تواكن .........فيه عقّلن دارن غلاه مطاير
امغير انت يامول الوشام الداكن....... ما اكربك ويش اللي معاها صاير

غلاك اشقابه ............................اللي من اجراره قاعدين غلابة
ما عالجوه بطب وانت اسبابه..........الفاهق اللي ما يجن عليه ستاير
و لاعد يلقوله دوا يبرابه ..............لو دبّروا مية اصحاب دباير
نلقانك تعرف صحيح خطابه .........امفيت تلتوا واتدير روحك باير

غلاك الماضي.......................... اللي من اجراره كابرات امراضي
انكان لك غرض ف الصوب كيف غراضي..بلا لف خلينا اصحاب ضماير
على تصرفك والله ماني راضي..... اللي ريت منه في دلال مواير
وبك الناس اتعيظ وزاد غياظي.... و فيا اسواقا كل يوم عباير

غلاك استاصل........................ وانت بقيت في جيب الدوا متكاسل
سوا كنت ما تدري سوا متفاسل..... ها لشي موصنعة اصحاب ضماير
علي كل ريح اغلبت فيك الحاصل.... نين بك جميع الناس في تعاير
ابقولت اللي شاقي وفيه تراسل........ لايم على غير ودار عشاير

غلاك بغيره ............................. انكان لك دوا فيديك فيسع ديره
وان وانست تسجّل عليك كبيرة ...... انوب وسوايا ما لهاش حكاير
انت راه قدرك مو حساب مطيرة ..... انهوزع بها في كل وادي عاير
امعاها انروق انجت تمام وخيرة ...... وانكان كذّبت نحرث العام الدّاير

غلاك زرابي............................ وانت في ظروف الحال مانك غابي
امخلي ارسال العقل ليش مصابي...... نهار وردهن يلون اتقول سناير
اتقول غير من يومك عليها عابي...... الخونة بدنو الغير وجهك ناير
ما اتقول لا ساعة عملت احسابي...... نين انشغلت وبات نومك طاير




--------------------------------------------------------------------------------

القصيدة الثالثة: وين ما انقول اتهوني
وين ما نقول تهوني..... تجي صورتك هذيك بين عيوني.... تزيدي غلا

وين مـــا نقـول نهونك ......... يلي مذيبلني سواد عيونك
لا حذاك في الدنيا علم لا دونك ......ولكن خسارة فيك عاكس عوني
ما زال ما عندي نقص قانونك ..... كيف ماأنت عندك نقص قانوني
ونجن قيس من ليلي ونا مجنونك .... حتي ونا سليم الناس يحسابوني
وين ما ثمر غيري قطف عرجونك .... ونا الهم لو يقتل كبار غبوني

وين ما نقول كفايا ...................وما عد نجر معاك في سهرايا
من يوماً رضيتي بالخراب معايا .... واخترتي اللي ماكان غالي دوني
عليك غير ماي ساعة عدد يا منايا .... ما هن سوايا واجدات ديوني
وظلمك وجفاك مخلَََََََفات سوايا .... ساكنات جوا ضربهن دكنوني
وزولك هذاك السمح كان تهايا .... وانتي ترتشاقي مشيتك فصعوني
تقول تشغلي في بهيب عنايا .... وانكان غمضت عيني حذاي تكوني

وين ما نقول نسيبك.............. حتي مسخرة ما عد نجيب سريبك
يجي الليل ويجيني منام يجيبك.... ونبقي عليك انق هذا لوني
ونذكر أيام زهاك وتشرهيبك .... وقول يا شقاهم من عليك نهوني
واليوم يا مرادي ما تقول طليبك .... ولا تقول عاهدتي غلاي تصوني
ولا تقول شاكيتي بما زاريبك .... كيف ما نجض بنار في مكنوني
طوعك الهم شوه صفاك وطيبك .... وما كنت نحسابك معاي تخوني

وين ما نقول تهوني.... تجي صورتك هذيك بين عيوني.... تزيدي غلا

_________________
Mox5500@yahoo.com
avatar
الليبي الصقع
عضو مشارك
عضو مشارك

الجنس : ذكر
البلد : ليبيا
عدد المواضيع : 79
العمر : 27
تاريخ التسجيل : 26/07/2008
نقاط : 6918

معاينة صفحة البيانات الشخصي للعضو http://www.mix3.yoo7.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى